Аккредитациялық Кеңес
САААЕ Аккредиттеу кеңесі туралы ереже
САААЕ Президенті А. Әбжаппаров 2025 жылғы 29 желтоқсанда бекіткен.
1. Жалпы ережелер
1.1. Орталық Азия білім беруді аккредиттеу қауымдастығының Аккредиттеу кеңесі туралы осы Ереже Қазақстан Республикасының «Білім туралы» Заңына, білім беру ұйымдарын аккредиттеу мәселелерін реттейтін Қазақстан Республикасының өзге де нормативтік құқықтық актілеріне, сондай-ақ Қазақстан Республикасы Білім және ғылым министрінің 2017 жылғы 27 қыркүйектегі № 482 «Орталық Азия білім беруді аккредиттеу қауымдастығын (САААЕ) аккредиттеу органы деп тану және 1-Тізілімге енгізу туралы» бұйрығына және «Орталық Азия білім беруді аккредиттеу қауымдастығы (САААЕ)» ЗТБ Жарғысына сәйкес әзірленді. Осы Ережені САААЕ Президенті бекітеді.
1.2. САААЕ Аккредиттеу кеңесі (бұдан әрі — АК) өз қызметін Қазақстан Республикасының заңнамасына, білім беру саласындағы уәкілетті органның нормативтік құқықтық актілеріне, САААЕ Жарғысына, осы Ережеге, сондай-ақ сапаны қамтамасыз ету жөніндегі халықаралық стандарттар мен басшылықтарға, оның ішінде Standards and Guidelines for Quality Assurance in the European Higher Education Area (ESG) және European Network for Accreditation of Engineering Education (ENAEE) стандарттарына сәйкес жүзеге асырады.
1.3. АК — сырттай бағалау материалдарын қарауға және білім беру ұйымдарын және (немесе) білім беру бағдарламаларын аккредиттеу мәселелері бойынша шешімдер қабылдауға жауапты САААЕ-нің тұрақты жұмыс істейтін алқалы органы.
2. АК құзыреті, құқықтары мен міндеттері
2.1. АК САААЕ Президенті құрған және бекіткен сыртқы сараптамалық комиссиялардың есептерін қарайды.
2.2. Материалдарды қарау нәтижелері бойынша АК аккредиттеу немесе аккредиттеуден бас тарту туралы алқалы шешімдер қабылдайды, олар САААЕ Президентінің бұйрығымен қолданысқа енгізіледі.
2.3. АК, егер САААЕ Жарғысында өзгеше көзделмесе, аккредиттеу өлшемшарттарын, рәсімдерін және АК қызметін реттейтін өзге де ішкі құжаттарды қарайды және бекітеді.
2.4. АК білім беру ұйымдарының сыртқы сараптамалық комиссияның қорытындыларымен не кәсіптік-қоғамдық аккредиттеу жүргізуге өтінімді қабылдамау туралы шешіммен келіспеуі туралы өтініштерін САААЕ ішкі құжаттарында белгіленген тәртіппен қарайды.
2.5. АК мүшелерінің қызметі ақылы негізде жүзеге асырылады. Төлем САААЕ мен АК мүшелері арасында жасалған азаматтық-құқықтық шарттарға сәйкес жүргізіледі.
3. АК құрамын қалыптастыру
3.1. АК-ның дербес құрамы САААЕ Президентінің бұйрығымен бекітіледі. АК-ның сандық құрамы кемінде 9 және ең көбі 15 мүшеден тұрады.
3.2. АК құрамына академиялық қауымдастықтың, жұмыс берушілердің, кәсіби бірлестіктердің, ғылыми ұйымдардың өкілдері, халықаралық сарапшылар, студенттер қауымдастығының өкілдері және қажетті біліктілігі мен тәжірибесі бар өзге де мамандар кіре алады.
3.3. АК құрамы кемінде үш жылда бір рет оның құрамының кемінде үштен біріне жаңартылуға тиіс. АК мүшелерінің өкілеттік мерзімі — қайта сайлану құқығымен бес жыл, бірақ қатарынан екі мерзімнен аспайды. Білім алушы болып табылатын АК мүшесінің өкілеттік мерзімі оның оқу кезеңімен шектеледі.
3.4. АК мүшесі өз қалауы бойынша оның құрамынан шығуға құқылы не мынадай жағдайларда АК шешімімен шығарылуы мүмкін: міндеттерін жүйелі түрде орындамау; дәлелді себептерсіз қатарынан үш отырыстан артық, оның ішінде бейнеконференция арқылы өткізілетін отырыстарға қатыспау; САААЕ немесе АК іскерлік беделіне нұқсан келтіретін әрекеттер жасау; міндеттерді объективті орындауға кедергі келтіретін мүдделер қақтығысының туындауы.
3.5. АК құрамына төраға, Кеңес мүшелері және хатшы кіреді.
3.6. АК Төрағасы АК мүшелерінің арасынан ашық дауыс берумен, жай көпшілік дауыспен, қайта сайлану құқығымен бес жыл мерзімге сайланады.
3.7. АК хатшысы САААЕ Президентінің бұйрығымен САААЕ қызметкерлерінің арасынан тағайындалады және дауыс беруге қатыспайды.
4. Отырыстарды өткізу және шешімдер қабылдау тәртібі
4.1. АК отырыстары очно, бейнеконференция арқылы не аралас форматта, САААЕ Президенті АК Төрағасымен келісе отырып бекітетін жылдық жұмыс жоспарына сәйкес жылына кемінде екі рет өткізіледі.
4.2. АК отырыстарын АК Төрағасы жүргізеді. Ол болмаған жағдайда төрағалық етуші — Төраға айқындаған не АК мүшелері сайлаған АК мүшесі.
4.3. САААЕ Президенті АК отырыстарына дауыс беру құқығынсыз қатысуға құқылы. АК Төрағасының тапсырмасы бойынша САААЕ Президенті отырыс модераторының функцияларын атқара алады.
4.4. АК хатшысы Кеңес мүшелеріне отырыстың күн тәртібін және аккредиттеу мәселелері жөніндегі материалдарды отырыс өткізілетін күнге дейін кемінде жеті күнтізбелік күн бұрын жібереді.
4.5. Отырыс қорытындысы бойынша АК хатшысы хаттама ресімдейді, онда отырыстың барысы, талқыланған мәселелер, дауыс беру нәтижелері және қабылданған шешімдер туралы мәліметтер қамтылуға тиіс.
4.6. Хаттама қағаз және (немесе) электрондық жеткізгіште ресімделеді, АК Төрағасы мен хатшысы қол қояды және Қазақстан Республикасының архив ісі және басқаруды құжаттамалық қамтамасыз ету туралы заңнамасына сәйкес сақталады.
4.7. АК отырысы оған АК мүшелерінің үштен екісінен астамы қатысқан кезде, олардың қатысу нысанына қарамастан, заңды болып табылады.
4.8. Шешімдер қатысып отырған АК мүшелерінің жай көпшілік дауысымен ашық дауыс беру арқылы қабылданады.
4.9. Дауыстар тең болған жағдайда АК Төрағасының дауысы шешуші болып табылады.
4.10. Материалдарды қарау нәтижелері бойынша АК мынадай шешімдердің бірін қабылдауға құқылы: 7 жыл мерзімге қайта аккредиттеу; 5 жыл мерзімге аккредиттеу; 3 жыл мерзімге аккредиттеу; анықталған ескертулерді міндетті түрде жою шартымен 1 жыл мерзімге шартты түрде аккредиттеу; аккредиттеуден бас тарту.
4.11. Отырыс хаттамасының жобасы отырыс өткізілгеннен кейін бес жұмыс күні ішінде АК мүшелеріне жіберіледі. Хаттама жобасына ескертулерді АК мүшелері оны алған күннен бастап жеті жұмыс күні ішінде жазбаша нысанда ұсынады.
5. АК шешімдеріне шағымдану тәртібі
5.1. АК-ның институционалдық және мамандандырылған (бағдарламалық) аккредиттеу жөніндегі шешімдеріне білім беру ұйымдары САААЕ апелляция рәсімінде белгіленген тәртіппен шағымдана алады.
5.2. Білім беру ұйымының өкілдері тиісті білім беру ұйымын аккредиттеу нәтижелері қаралған кезде АК отырысына дауыс беруге қатысу құқығынсыз қатысуға құқылы.
5.3. АК шешімімен келіспеген жағдайда білім беру ұйымы САААЕ ішкі құжаттарында белгіленген тәртіппен және мерзімдерде САААЕ-ге жазбаша өтінішпен (апелляциямен) жүгінуге құқылы.
5.4. Жазбаша өтініш, егер Қазақстан Республикасының заңнамасында немесе САААЕ ішкі құжаттарында өзге мерзім белгіленбесе, тіркелген күнінен бастап он жұмыс күні ішінде қаралады. Қарау нәтижелері бойынша өтініш берушіге дәлелді жазбаша жауап жіберіледі.
6. Қорытынды ережелер
6.1. Осы Ережеге өзгерістер мен толықтырулар Қазақстан Республикасының заңнамасы, білім сапасын қамтамасыз ету саласындағы халықаралық талаптар не САААЕ ішкі құжаттары өзгерген жағдайда енгізіледі.
6.2. Осы Ережеге өзгерістер мен толықтыруларды Аккредиттеу кеңесі қарайды және САААЕ Президенті бекітеді.
6.3. Осы Ереже, егер тиісті бұйрықта өзгеше көзделмесе, оны САААЕ Президенті бекіткен күннен бастап күшіне енеді.